काठमाडौँ – दुनियाँ प्रविधिको पाँचौ जेनेरेसनबाट छैटौ जनेरेसनमा प्रवेश गर्दैछ यसले संसारको आधारभुत सोंचमा नै गतिशिलता,विविधता र व्यापकताको माग गरेको छ यहि समयसंग दौडनसक्ने नविन सोंच नै अवको गोर्खा ड्रिम हो । अध्यात्म विस्तार,राज्य विस्तार,सेना निर्यात र युवा कामदार निर्यातका आफ्ना चार ओटा जेनेरेसन पार गरिसकेको गोर्खाराज्य (नेपाल) संग अव पाँचौ जनेरेसनमा गुणात्मक फड्को मार्दै आफ्नो अस्तित्व कायम राख्नुको विकल्प छैन ।
अव गोर्खाका नामले परिचित नेपालको अस्तित्व धान्ने नयाँ खोज, नयाँ पद्धती र नयाँ प्रकृया अर्थात (नवोत्थान) इन्नोभेसनले मात्रै हो । यसमा अनुभवको आधारमा कदम चाल्ने कुरा हुँदैन बरु परिकल्पनाको आधारमा वर्तमानमा जीउनु र भविष्यको खोजी गर्ने कुरा महत्वपूर्ण हुन्छ । ट्रेडिशनल कार्य पद्धती, औजार र कम्पनीहरु रेभ्युलेशन कार्यपद्धती,औजार र कम्पनीका अघि धेरैबेर टिक्ने छैनन् भन्ने कुरा इन्नोभेसनले सावित गरिसकेको छ । इन्नोभेसन मानव जातिको हरेक नयाँ जेनेरेसनका लागि आफैंमा वृहत रेभ्युलेसन हो ।
जस्तै थ्रि डि स्क्यानर प्रिन्टर विश्व बजारमा निकै ठूलो आँधीका रुपमा आउँदैछ । थ्रि डि प्रिन्टीङको माध्यमद्धारा चीनको एउटा कम्पनीले १ दिनमा १० ओटा महल निर्माण गरिदियो । थ्रि डि प्रिन्टिङको माध्यमबाट दुबइमा एक कम्पनीले एकै दिनमा कयौं तला अग्लो भवन निर्माण गर्यो । अवको केहि समयपछि रोवर्टले फार्मिङको काम गर्ने छ र किसान म्यानेजरमा पदोन्नती हुनेछ । गुगल चालक रहित गाडीले दशौं हजार किलोमिटर सडकमा परिक्षण यात्रा गरिसकेको छ । यसको मतलब अब दुनियाँ प्रकाशको गतिमा परिवर्तन खोज्दैछ ।
जसले तिब्र गतिमा आफ्नो कल्पनालाई वास्तविकतामा बदल्ने आँट र अठोट सहित इन्नोभेसनमा आफुलाई अग्रपंक्तिमा उभ्याउने छ, संसार उसैले जित्ने छ । इन्नोभेसनले मानिसको जीवनपद्धतीमा अकल्पनिय सुखद मोडहरु ल्याउँदैछ, सोच्ने तरिकाहरुमा,काम गर्ने शैलीमा र आम मानिसका इच्छाशक्तिमा यसले ल्याउने क्रान्तिको ज्वारभाँटाले संसार वास्तविक स्वर्गको पर्याय बन्ने छ ।
नविन आविष्कार वा नविन प्रवर्तन (इन्नोभेसन) कुनै यन्त्र वा उपकरणमा मात्र सिमित रहँदैन । इनोभेसन मानव समाजको पुरातन दशा र दिशा बदल्नका लागि आविष्कार गरिने एक प्रकारको अत्याधुनिक युगिन प्यार्टन हो । उन्नयन अर्थात इन्नोभेसन भनेको केवल साधारण र क्रमिक परिवर्तन मात्रै होइन बरु त्यो परिवर्तन विद्यमानभन्दा अझ व्यापक रुपमा राम्रो भन्ने अर्थ हुन आउँछ । सारतः इन्नोभेसन फगत परिवर्तनभन्दा गहिरो सोंचको खोजी हो ।
यसले मानव समाजको आर्थिक,राजनीतिक,सामाजिक,साँस्कृतिक र प्राविधिक क्षेत्रमा तिब्रतम विकास तथा संभावनाको ढोका खोल्ने भएकाले यो शब्द छोटो समयमै व्यवहारिक रुपले लोकप्रिय बनेको छ । इनोभेसन यूवाहरुको रचना,सृजना र खोजको उच्चतम अभिव्यक्ति हो । जसले मानव समाजको प्राविधिक प्रगतिको सूचकांकका अतिरिक्त सुख,समृद्धि,खुशी,आर्थिक तथा चेतनाको स्तरलाई अझ उचाइमा उठाउन अत्याधिक पहलकदमी लिनसक्छ । समग्रमा इन्नोभेसन वर्तमान युगको त्यो चावी हो जसले भविष्यको भाग्यको समेत ढोका खोल्नसक्छ । त्यहि इनोभेसन अवको गोर्खा ड्रिम हो ।
