नयाँ बर्षलाई स्वागत

काठमाडौँ – नमस्ते नयाँ बर्ष २०८० को आज पहिलो दिन यहाँहरुको समय शानदार बनोस, उभिएको धर्ति बासनादार बनोस,नम्रता,शिष्टता र नैतिकता सदावहार बनोस । देश विदेशमा रहनु भएका सम्पूर्ण नेपालीहरुका लाखौं सपनाहरु रंगिन बनुन् । यिनै र यस्तै कामना सहित हामीले नयाँ बर्ष २०८० लाई स्वागत गर्दैछौं ।
आशा गरौं यस बर्ष बाट इमान,मुल्य र अनुशासन व्यक्ति,समाज र राज्य संरचनाको दैनिकिमा अभिव्यक्त हुनेछन् यो हाम्रो चाहना हो । जिर्ण संरचना,साँघुरा सोच, पुराना अन्धविश्वास,थोत्रा विचार,खिया लागेको चरित्र,मक्किएको व्यक्तित्व,धरापमा रहेका प्रणाली र बुढ्यौलीमा बाँचेको दराजको दर्शनलाई स्विकार गरिरहनुपर्ने वाध्यताको अन्त्य होस् ।
२८ करोड आम्दानीका लागि साढे ३ अर्व खर्च गर्नुपर्ने हुलाक सेवाको व्यापारबाट त हामी आजित छौं नै उपभोक्ताबाट हाताहात पैसा लिएर घाटामा जाने आयल निगमको खेलले दशकौं देखि निराश बनाएको छ । बर्षेनी करोडौं घाटाको विवरण पेश गर्ने नेपाल वायु सेवा निगमको दुर्दशा हेरि नसक्नुको छ । निजी विमानसेवाहरु अर्वौ नाफामा रहँदा राष्ट्रिय वायुसेवा अर्वौ घाटामा छ ।
बुढ्यौलीले अशक्त बनेको कृषि सामाग्री केन्द्र, महावीर पुनले भेन्टिलेटरमा श्वास जोगाइरहेको औजार कारखाना, राज्य सम्पत्तिमाथि मिलाएर चलखेल गरिरहेको साल्ट ट्रेडिङ कर्पोरेसन,बर्षौ देखि औषधि निर्माणका औजार र प्रकृयामा खिया लगाएर घाम तापिरहेको औषधि लिमिटेड केन्द्र यस्ता दर्जनौं राज्य स्वामित्वका संरचनाहरु भ्रष्टाचारको अखडा बनेर वन्द गर्नुपर्ने अवस्थामा छन् । तिनलाई पुनर्जिवन दिएर भ्रष्टाचारीलाई हतकडी लगाउनुपर्ने कानुनी शासनको युग सुरुवात होस । अन्तमा अपेक्षा गरौं वि.सं. २०८० हाम्रा लागि नियत,चरित्र र संरचनागत सुधारको बर्ष हुनेछ ।