सञ्चार तथा सूचना प्रविधिमन्त्री रेखा शर्माले गणतन्त्र दिवस कर्मकाण्डी तरिकाले मनाउन नहुने बताएकी छिन् ।
आइतबार काठमाडौंमा आयोजित एक कार्यक्रमलाई सम्बोधन गर्दै मन्त्री शर्माले गणतन्त्रका उपलब्धि उल्ट्याउने प्रयास भइरहेको भन्दै उपलब्धिको समीक्षा गरेर अघि बढ्न जरुरी रहेको बताएकी हुन् ।
उनले राजनीतिक दलहरू आफूले गरेका गल्तीको समीक्षा गरी सच्याएर जान जरुरी रहेको बताइन् । सञ्चारमन्त्री शर्माले संविधानमा भएका प्रावधानलाई समयमा नै नागरिक समक्ष पुर्याउन नसकिएको बताइन् ।
उनले संविधानमा व्यवस्था गरेका कुरा लक्षित समुदायले थाहा पाउनै नसक्दा विभिन्न समस्या सिर्जना भइरहेको बताइन् । उनले कानुनले १८ वर्षभन्दा कम उमेर समूहका महिलामाथि शारीरिक सम्बन्ध राख्नुलाई बलात्कार हुनेकुरा उल्लेख गरे पनि कानुनको बारेमा लक्षित समुदायसम्म बुझाउन नसक्दा कतिपय मानिसहरू बलात्कारको मुद्दामा परिरहेको बताइन् ।
सञ्चारमन्त्री शर्माले कानुनलक्षित समुदायमा समयमा नै पुर्याउन नसकेका कारण १८ वर्षमुनिको महिलामाथि शारीरिक सम्बन्ध राखेर बलात्कारको मुद्दामा पर्नेहरूको संख्या बढी रहेको बताइन् । उनले पैतृक सम्पत्तिको समानताबारेमा पनि लक्षित समुदायमा सूचना पुर्याउन नसकिएको बताइन् ।
