सुदूरपश्चिमका मुख्यमन्त्री शाहको टोली र प्रधानमन्त्री दाहालबीच भेटवार्ता

प्रधानमन्त्री पुष्पकमल दाहाल ‘प्रचण्ड’सँग सुदूरपश्चिम प्रदेशका मुख्यमन्त्री कमलबहादुर शाह नेतृत्वको टोलीले बुधबार भेटवार्ता गरेको छ। टोलीले प्रधानमन्त्रीको सरकारी निवास बालुवाटारमा प्रधानमन्त्री दाहालसँग आज बिहान भेटवार्ता गरेको हो। भेटवार्तामा सुदूरपश्चिम प्रदेशका मुख्यमन्त्री, मन्त्री र प्रतिपक्षी दलका नेताको उपस्थिति रहेको प्रधानमन्त्रीको सचिवालयले जनाएको छ। भेटवार्तामा मुख्यमन्त्री शाहले आगामी बजेटमा सुदूरपश्चिमलाई प्राथमिकतामा राखेर प्रदेशका ठूला तथा गौरवका आयोजनालाई अगाडि बढाउन प्रधानमन्त्री दाहालसँग आग्रह गरेको सचिवालयले जनाएकाे छ। कैलालीको गेटा मेडिकल कलेजको विषयमा पनि छलफल भएको बताइएकाे छ। मुख्यमन्त्री शाह नेतृत्वको टोलीले मंगलबार अर्थमन्त्री डा. प्रकाशशरण महतलाई पनि भेटेको थियो। केन्द्र सरकारले बजेट निर्माणको अन्तिम तयारी गरिरहँदा सुदूरपश्चिमका मुख्यमन्त्री शाह नेतृत्वको  टोली बजेट सुनिश्चित गर्न  काठमाडौँ आएकाे हाे।